«Ауыл» партиясы Мемлекет басшысының бастамасымен жүзеге асырылып жатқан конституциялық реформаны толық қолдайтынын мәлімдейді. Біз бұл өзгерістерді елді ауқымды саяси жаңғыртудың құқықтық негізін қалайтын іргелі тарихи кезең деп бағалаймыз. Ата заңның реформалануы - «Әділетті Қазақстан» тұжырымдамасының тікелей көрінісі және мемлекеттік басқару жүйесін ашықтық, есептілік пен шынайы халықтық билік қағидаттарына сәйкес трансформациялауға жағдай жасайды.
Ауылдық аймақтардың және аграрлық сектор мүддесін қорғайтын «Ауыл» партиясы үшін жер мен табиғи ресурстардың халық меншігі екендігі туралы мәртебенің конституциялық деңгейде бекітілуі ерекше стратегиялық маңызға ие. Бұл норма тарихи әділдікті қалпына келтіріп қана қоймай, еліміздің азық-түлік тәуелсіздігі мен ауыл тұрғындарының экономикалық қауіпсіздігіне кепіл болады.Билік өкілеттіктерінің қайта бөлінуі, Парламент пен мәслихаттар мәртебесінің күшеюі биліктің барлық деңгейінде ауыл еңбеккерлерінің мүдделерін тікелей қорғауға жаңа мүмкіндіктер ашады.
«Ауыл» партиясы барша отандастарымызды азаматтық жауапкершілік танытып, демократиялық реформалар бағытының айналасына топтасуға шақырады. Біз жаңа конституциялық құндылықтардың белсенді насихатшысы болуға дайын екенімізді растаймыз және оларды сапалы іске асыру үшін барлық ресурстарымызды жұмсаймыз. Ел болашағы мен әрбір қазақстандық ауылдың гүлденуі - біздің заманауи, қуатты және демократиялық мемлекет құру жолындағы ортақ шешімімізге байланысты.
