ҚР Ауыл шаруашылығы министрлігі мен Түркістан облысының жедел штабы зиянкестермен күрес маусымына дайындық барысын талқылады. Тиімді мониторингтің арқасында өңдеу алқаптарының көлемін өткен жылмен салыстырғанда жарты миллион гектарға азайту мүмкін болды.
Мамандардың болжамы бойынша, 2026 жылы үйірлі шегірткелерге қарсы химиялық өңдеу жұмыстары 2,2 млн га алқапта жүргізіледі. Бұл 2025 жылғы көрсеткіштен 500 мың гектарға аз. Ауыл шаруашылығы министрлігі бұл төмендеуді өткен маусымдарда зиянкестер ошақтарының дәл анықталуымен және олардың жедел жойылуымен байланыстырады.
Биыл «қанатты қауіппен» күрес тактикасына өзгерістер енгізілді. Негізгі басымдық зерттеу әдістерін жаңғыртуға беріліп отыр. Егістіктерді бақылауға арналған ұшқышсыз ұшу аппараттарының (ҰҰА) саны 57 бірлікке жетті (қосымша 50 дрон сатып алынды), жұмысқа 3500-ге жуық маман тартылды. Химиялық өңдеу қызметтерін сатып алудың бірыңғай жүйесі енгізіліп, пайдаланылатын пестицидтердің сапасына қойылатын талаптар күшейтілді.
Жоспарланған жұмыстардың жартысынан астамы — шамамен 1,17 млн га — Ресей Федерациясымен шекаралас аймақтарға (Атырау, Батыс Қазақстан, Ақтөбе, Қостанай, Павлодар, Шығыс Қазақстан және Абай облыстары) тиесілі.
АӨК мемлекеттік инспекциясы комитетінің төрағасы Сәкен Қаныбеков трансшекаралық ынтымақтастықтың маңыздылығын атап өтті:
«Қызметтеріміздің үйлесімді жұмысы өткен жылы зиянкестердің мемлекеттік шекара арқылы миграциялануына жол бермеуге мүмкіндік берді. Ресейлік әріптестермен наурыз айында қол қойылған бірлескен іс-шаралар жоспары биылғы маусымда да фитосанитарлық қауіпсіздікті қамтамасыз етеді».
